ചില പ്രായോഗിക ചര്‍ച്ചയ്ക്കൊടുവിലാണ്
നരമാംസം വിളമ്പാമെന്ന തീരുമാനത്തിലെത്തി
പച്ചബോധത്തില്‍ ശരീരത്തെ വിളമ്പുന്നതില്‍ ഇല്ലാത്ത
എന്ത് ധാര്‍മിക പ്രശ്നമാണ്
പല്ലിനിടയില്‍ വെന്തതിനെ ചേര്‍ത്ത് ചവയ്ക്കുമ്പോള്‍
ഉണ്ടാകുന്നത് എന്ന ചോദ്യത്തിനോടുവിലാണ്
അങ്ങനെയാവമെന്നു ഉറപ്പിച്ചത്.
ഇളം പെണ്ണുവേണമെന്നാണ് അഭിപ്രായം
കിട്ടിയാല്‍ തന്നെ ഇറച്ചിവെട്ടുകാരനില്ലാതെ എങ്ങനെ നുറുക്കും
ചിക്കന്‍ മസാലയിലാണോ
അതോ പോത്തിനെ വേവിക്കുംപോലെ വേണോ?
എന്ന തീരുമാനം എനിക്ക് വിട്ടാണ് സഭ പിരിഞ്ഞത്.
പുതിയ പാചകകുറിപ്പില്‍ ചോരയില്‍ വേവിക്കണം
എന്ന് എഴുതി ചേര്‍ക്കുമ്പോള്‍
മാക്സിമം യൂട്ടിലിട്ടി സിദ്ധാന്തമായിരുന്നു മനസ്സില്‍
മുടികുരുങ്ങി നാളെ വാഷ്ബേസിന്‍
അടയുന്നതും പേടിച്ചാണ് ഉറങ്ങാന്‍ കിടന്നത്.
ഇറച്ചിവെട്ടുകാരനുമായി ഒരുവനെത്തുന്നതും കാത്തു
പാതിയുറക്കം കട്ടിലിനു താഴെ കുന്തിച്ചിരിപ്പാണ്
പടിപ്പുരയില്‍ സൈക്കിള്‍ മണിമുഴങ്ങിയപ്പോള്‍
എന്നേക്കാള്‍ മുന്‍പ് വാതിലിന്റെ ചാവി തേടിപ്പിടിച്ചത്
അവന്‍ തന്നെയായിരുന്നു
അവനു നാളെയെ പേടിയില്ല. അതാവും കാരണം
പെണ്ണിനെ നടുവേ മുറിച്ചു പോളിത്തീന്‍ പൊതിഞ്ഞു
കൊണ്ടുവന്നപ്പോഴും ആവേശത്തിന്
തരിമ്പും മാറ്റമില്ല
വെട്ടിക്കിട്ടാന്‍ താമസിച്ചത് പെണ്ണിന് മേനി
കൂടിപോയതുകൊണ്ടാണെന്നത് വെട്ടുകാരന്റെ സാക്ഷ്യം
ഉള്ളി മുളക് എന്നിവ സമം ചേര്‍ത്ത് എണ്ണയ്ക്ക്
പകരം ചോര ചേര്‍ത്ത് വഴറ്റി
മുളകുപുരട്ടിയ മാംസം നേര്‍പ്പിച്ച ചോരയില്‍ വറ്റിച്ചെടുത്തത്
പെരുവയറനു തികയാതെ വരുമെന്നാണ്
വെട്ടുകാരന്റെ സിദ്ധാന്തം
ഏതായാലും തിന്നു മദിച്ച് പരുവം കേട്ട്
സഭപിരിഞ്ഞപ്പോള്‍ വോട്കയില്‍ കാന്താരി ചേര്‍ത്തത്
രുചിച്ചു കൊണ്ടു ചാരുപടിയില്‍
ആകാശം നോക്കി ഇരിക്കുകയായിരുന്നു ഞാന്‍
തോനുന്നത് പേടിയല്ലന്നത് വാസ്തവം
പുലര്‍ച്ചെ വെട്ടുകൊണ്ട വേദനയിലാണ് ഉണര്‍ച്ച,
മതിയാവാതെ വന്നതാവും എന്ന്
ഉറക്കത്തില്‍ തന്നെയാണ് ചിന്തിച്ചത്.
എന്റെ രുചി നീയറിയൂ
കൊള്ളാവുന്നതെങ്കില്‍ പങ്കുവെയ്ക്ക്
തിന്ന്
തിന്ന്
മദിക്ക്
നഖം മറ്റേവന് കൊടുക്ക്‌
മുടി നീയെടുത്തോ
ഇറച്ചി ഇന്നലത്തെതില്‍ ചേര്‍ത്ത് വേവിക്ക്
തിന്നപാപം കൂടെ വെന്തു തീരട്ടെ
രുചിക്ക് കുരുമുളകിടൂ
നിന്റെ നാവിനു
ഞാന്‍ രുചിയെങ്കിലും ആവട്ടെ...
ഇളയതാണെങ്കില്‍ ഉപ്പും മഞ്ഞള്‍പൊടിയും അല്പം കുരുമുളക് പൊടിയും മാത്രം മതിയായിരുന്നു.
ReplyDeleteകൊന്നാല്‍ പാപം തിന്നാല്‍ തീരുമെന്നല്ലേ...
എഴുത്തില്‍ അരുചി തോന്നിയില്ല,
എങ്കിലും എന്തോ ഒരു പന്തികേട്..